MAMM'ARCANGIULA

Nonnama, la mamma ri patrumu, si chiamava Arcangela De Mita ma la gendu la chiamava Arcangiula ri lu sagristanu pu bia ri li vavi sua quasi tutti "servi ri Diu" comu ruceva essa e s'avandava puru ri lu beatu Nicola.

Era na femmuna severa, sufistuca e pulitissima, quannu vuneva a casa nosta nun s'assittava mai prima ri si luvà o ri s'azà la gunnella pu nu la spurcà e si nui criaturi ngi'abbicinavami, ngi nfugava e nun ngi pigliava mai nbrazza.

Abbitava Ngoppacastiellu ind'a la casa frabbucata ra Pietro Russo, lu nonnu miu cassanesu emigratu e muortu a l'America. La nonna parlava sembu ri li sagrificii ch'avevanu fattu a carrìà terra, a shcavà sotta ru quindu e mbalà lu barconu chiù ghirtu ri Nuscu. Tuneva paricchj lenzu ri terra e li parsunali ri la Chiánula e di lu Punnilu nun ngi facevanu mai mangà niendi.

Tuneva puru n'allevamendu ri sanguettu e ru ghieva muttennu a la gendu malata o chi nun si firava. Mó stu sanguettu ievanu truvannu paricchj acqua pu cambà e siccomu nun ng'era in casa, s'aveva ì a pigliarila a la fundana, nnanzi a la Tirnità. Pu l'angarizia ri na cosa ra mangià, i' ieva spissu andó la nonna pu ngi la carrìà. Lu purtonu ri la puteia era sembu chiusu pu paura ca ngi spurcavami la casa, aveva tuzzulà e chiamà paricchj votu po' vuneva, apreva, mi reva lu catu e i' bellu, curri curri, ngi lu purtava chjnu. Essa m'asputtava nnanz'a la porta, mi lu luvava ra manu, anghieva tutti li stangielli e ru quartaru, mi raccumannava r'asputtà foru e mendri mi jeva a piglià na bella cosa, i' smirciava ind'a la puteia senza trasì.

Quanda cosu ng'eranu: vulanzu, stipi, caccavi ri rama, angiuli e marunnellu, ma la cosa chi chiù mi ndricava era nu varrilu ind'a na nicchia.

Nu juornu lu parsunalu saglieva la robba chi l'aveva purtatu, cu Pietru ngi nfulammi ind'a la puteia, luvammi l'uppulu e nmuccammi lu varrilu, lu vinu cumingiavu a scorru, roci, prufumatu e appena fattu, accussì mendri i' manduneva, fratumucucinu vuveva tranquillu. A lu turnu miu ri lapatijà, nu l'aveva mangu pruvatu quannu ndunghi ndunghi pu la scalinata n'abbasci, sundiemmi la nonna scennu.

La paura ca ngi'angappava faceva a novanda accussì scappai a la via ri la porta e lassai Pietru sulu e mbaurutu chi nun ngi la faceva a addirizzarilu:

- lassalu, scappamu si no quera ngi acciri - alluccai e lu fessa lu lassavu.

Lu varrilu carivu, si spaccavu e lu vinu scurrivu pu lu vicu n'abbasci finu a la Tirnità.

Cu tre juorni mamm'Arcangiula ivu alluccannu pu tuttu lu paesu:

- Li delinguendi, li nuputi m'hannu arruguinatu, m'hannu struttu na casa! -

Passavunu tre o quattu misi, ngi faceva lu mussu, nun buneva chiù a casa, ieva sembu sprubbucannu cu la gendu: - Nui famiglia ri sandi amm'avutu avè li nuputi riavuli, chi mi r'aveva rici! -

Quannu fu San Giuseppu, mamma feci ru zeppulu e ni feci paricchj pucchè era lu nomu ri pàtrumu: - E l'accasionu ri luvà ssu mussu e di fà paci cu la nonna, va la chiama e l'addummanni si volu vunì a mangià cu nui. -

Ra miezz'a la via chiamai: - Mamm'Arcà, mamm'Arcà! ha dittu papà ca oj è San Giuseppu e amma fà paci, ammu fattu puru ru zeppulu e tu hè a vunì a casa a mangià cu nui, Mamm'Arcà, mamm'Arcà! -

- vavattennu ca nun mi firu! -

Turnai a casa e cundai lu fattu a pàtrumu, chi buonu ri coru nzustivu: - E` puccata, è sola, muttitingellu ind'a nu piattu, si ru mangia quannu volu essa -

Accussì turnai n'ata vota Ngoppacastiellu e chiamai, tuzzulai e chiamai...mi vunivunu ru lacrumu a l'uocchj: - Ma pucché adda essu accussì? E pó rici ch'è sanda! Cu nu picca ri vinu juttatu, la faci accussì longa? Si ngi l'aveva ratu a nui, tuttu questu nun succiureva.-

Ra li niervi, mi mangiai tuttu ru zeppulu e mi sundietti n'atu tandu. Lu juornu appriessu la nonna ieva rucennu cu la gendu:

- Che puccatu quiru crìaturu, m'ha purtatu ru zeppulu a casa e i' nu l'aggi mangu ruspuostu. Che bravi nuputi tengu! -

 ________________________________________________________________________________________________________________________________________________

De Mita:  La nonna roccontava, con aria fiera, che  discendeva dalla stessa famiglia del beato Nicola (1696-1785) e che molti dei suoi antenati erano sacrestani o si dedicavano a Dio. Personalmente ricordo un suo fratello "Zi Carminiellu" sacrestano negli anni '50.

Pietro Russo:  Mio nonno era originario di Cassano Irpino. Sua sorella Rosolina era la madre del professore Giuseppe Passaro

Chiù ghirtu ri Nuscu:  Le case fatte da mio nonno e dal cognato si trovano una a fianco all'altra " 'Ngoppacastiellu " nel punto (edificato) più alto di Nusco.

Sanguettu:  La nonna allevava le sanguisughe e si rendeva a casa della gente per applicarle sulle parti malate del corpo.

Bella cosa:  in generale erano cose da mangiare, spesso della frutta.

Faceva lu mussu:  Portava rancore.  

________________________________________________________________________________________________