LU TRIANGULU RI RU BERMUDU

A quiri tiembi, stò parlannu ri li primi anni 60 e ‘i era picciulu, la Rumenuca a Nuscu si puteva quasi rì ca era na picciula festa, pucchè ng’era lu mercatu e  la feru[1] e perciò paricchi ggendu vuneva ra foru[2] (stà parola m’è sembu sembrata nu pocu razzista, quasi com’a queru ca rici “Umbertu” a lu Nord) o cu vvennu  o cu accattà e quaccunu ni approfittava puru cu da’ na sistimata a la propria persona o a la casa. E qua ng’è ra spiegà pucchè aggi intitolatu accussì stà storia.

  Avita sapè ca nonnumu bonanuma era Matucciu ri Nasonu e faceva lu barbieru vicinu a lu Corsu, tuneva nu collegamentu specialu cu dui amici e puru loru putugari[3]: Toninu Futussu ca tuneva lu bar a S. Amatu e Ciccillu ri Micalangiulu ca tuneva lu negoziu ri vestiti a Santa Croci. L’attività pringipale era quera ri lu negoziu però, si acchiappavanu quaccunu nu pocu abbunatu[4] mmiezzu a stù triangulu, nun g’era cchiù scampu e lu facevanu martiru.

 ‘Na rumenuca ri questa, arrivavu andò nonnumu nu guaglionu gruossu[5] ri foru e li rissu ca lu mannava Ciccillu ri Micalangiulu circannuli[6] nu pocu ri tuzzabanconu cu si lu purtà a casa foru. Nonnumu, appena suntivu lu nomu ri Ciccillu, capivu ca era scattata la trappola e li ruspunnivu ca era rispiaciutu ma era finitu, forsi arrivava cchiù tardu, ma forsi n’aveva tunè ancora nu pocu Toninu Futussu. ‘I appena sundietti stà parola strana ri stu prodottu cu mme nuovu, circai a nonnumu lu signifucatu, ma issu subbutu mi rissu: “Cittu tu, ca si picciulu”.  Stù guaglionu si ni ivu e, tuttu speranzusu, ivu andò  Toninu Futussu ca, appena sunduta la cosa, feci riaccummingià lu giru a quiru povuru Cristu ca continuava a ggirà cu la speranza ri ni truvà nu pocu.

 Li tre apici ri lu triangulu si commuovivunu[7] sulu versu l’una, quannnu la ggendu accumminciava a ritirarisi cu mangià e quiru aveva fattu già tre giri ri stu triangulu e li rissunu ca era sfurtunatu pucchè quera rumenuca nun ni era arrivatu mica e, si vuleva,  puteva turnà la prossima rumenuca.

 ‘I nu l’aggi vistu ru dumenucu roppu, sicuramendu lu guaglionu avrà cundatu la storia a lu patru ca l’avrà fattu nu lisciu e bussu pucchè a quer’età s’era fattu fa’ fessa cu na matinata sana.

                                                                                       Carlo Giannetta