GRAZIA RI DIU

Appena arruvatu ra la Svizzera, Ndoniu ivu foru a salutà li cumbari Grazia, Michelu e Giuguannu lu crìaturu ri ott'anni chi aveva tunutu a lu battezzu; arruvatu a la massaria, truvavu la cummara sola. Grazia, na trendina r'anni, era na bella femmuna, la carnaggionu gindila e la purtata signurila, nun pareva propriu una ri la cambagna. Ndoniu ra quannu aveva vattìatu lu guagliungiellu, si n'era jutu ri capu. Puru essa, quannu puteva, condrocambiava aucchiatu e surrisi maliziusi.

Quiru juornu Grazia tuneva nu vistitu comu lugliu cummannava, salutavu lu cumbaru e lu feci assittà, pó prima ri li piglià a bevu pulizzavu nu picca la tavula. Ndoniu si surchiava lu vinu cu n'uocchj a lu bicchieru e l'atu a la cummara

-Cummà vienimi fà' cumbagnia, assettati e bivi puru tu-

-Noni cumbà, lu vinu mi raci subbutu ngapu e pó nun cunghiuriscu chiù niendi.-

Ndoniu nzustivu nu picca accussì la cummara s'anghjvu nu bicchieru e pó comu si faceva nu puccatu, si lu mbalavu una tirata: -Sundeva seta puru i' cumbà, è luveru faci cavuru assai.-

Assittati unu nfrondu a l'atu cumingiavunu a fà cundi. Essa parlava ri la cambagna, ri la vita difficila specialmendu pu la femmuna chi nun si potu mai vestu bona e sta sembu ammusaruta.

Issu li cundava ca Ndunetta la miglieru nun era pututa vunì e ca pu n'ommunu sulu era nu sagrificiu.

-Comu ti capiscu cumbà, adda essu veramendu bruttu curcarisi sulu e girarisi ind'a lu liettu-

-Vìata a te cummà ca la sera ti cunzuoli cu comba Michelu.-

-Che ni sai tu ri Michelu, quiru la sera è sembu straccu e appena si corca rormu.-

-Oh cummara mia lu Signoru manna ru panu a chi nun tenu riendi, l'avessu i' na miglieru bella e bona com'a te-

-E che facissi cumbà?-

Ndoniu s'azavu, s'azziccavu vicinu, li muttivu ru manu ind'a li fianghi:

-Noni cumbà quessu no, songu spusata e nun sta benu.-

-Cummà mó l'avimu l'accasionu, chisà quannu cápita n'ata vota, só ott'anni, ra quannu ti canoscu chi ti disideru-

-Puru i' ra quannu t'aggi vistu la prima vota ti vogli benu, t'aggi punzatu sembu, ma quessu no, nun pozzu trarì maritumu.-

Ndoniu nzustivu angora

-Noni cumbà Ndó, ti vogli benu peró vogli benu puru a Michelu nun sia mai si trova a bunì simu nguaiati tutt'e dui, macari a nu postu chiù sicuru? Vieni cu me!-

Picca lundanu ng'era a na pagliera chiena ri fienu frishcu tagliatu, na cangilluzza faceva passà nu filu ri luci quand'abbastava pu guardarisi indu a l'uocchj, Grazia mbalata nun sapeva che fà, allora Ndoniu l'accumingiavu a spuglià:

-Maronna mia cumbà mi sendu mangà, nun sia mai ru benu a sapé Michelu, quiru m'acciri! Tu pó che pienzi ri me? I' songu na femmuna onesta, nu r'aggi mai fattu cu nisciuni, mangu Michelu m'ha mai spugliatu comu fai tu mó, r'avimu sembu fattu a la scuria, e pó si nun ti piaciu? Si nun m'appriezzi? Chisà comu patisci? E comma Ndunetta chi nun g'è pu ti carmà, quandu mi rispiaci! Ti vulessu fà cundendu pucché si nu buonu cristianu e buoi tandu benu a quiru crìaturu miu  ... e pó che cumbari simu si nun ngi aiutamu unu pu l'atu? 

M'hè a prumettu però ca chiuri l'uocchj e fai cundu ca stissi cu comma Ndunetta chi è tandu na bona cristiana e chi sicuramendu, quannu venu si leva l'óbblicu cu Michelu miu!-

Pu Ndoniu fu na mazzata nfrondu, nun parlavu chiù e purdivu puru l'apprezzamendu, pigliavu la via ri la porta e prima r'assì si vutavu, la guardavu ra capu a peru:

-Puccatu- rissu -quanda Grazia ri Diu m'aggi persu!-

                                                    Pietro Russo  -  1970