Carnu chi cresci

Zì Ruminucu e zì Sabbetta nun ng'eranu zii ma accussì ru chiamavami pu rispettu.

Stevanu buoni e ogni annu roppu accisu lu puorcu, anghievanu la casa ri tuttu ru benu ri Diu.

Quannu, pu ricanuscenza a scarpu e scarpini ca patrumu ngi'aveva fattu,ngi nmitavunu a mangià a casa loru,nziemi a fratimi piccirilli ierimi tutti prìati. Mamma ngi lavavu, ngi vustivu puliti pó prima r'assì,papà ngi feci la preruca:

-Nun mi faciti fà brutta figura,calativi na vota sola,mangiàti chiani e pó ruciti ca siti sazii,mi raccummannu,si no quannu turnamu facimu li cundi!-

Quann'arruvammi la tavula era già preparata cu nu bellu musalu jangu e nu canustriellu ri panu frishcu. Zì Ruminucu ngi feci assittà e pó purtavu n'arzulu ri vinu,anghjvu li bicchieri e ngi ni rivu unu purunu, puru a nui crìaturi chi ngi ru mbalammi comu a li gruossi. Mendri i' m'assucai cu la manu pu nun fà, fà brutta figura a patrumu, fratimi picciuli rustavanu cu li mustazzi.

Roppu picca Zì Sabbetta purtavu ngimma la tavula na fullata ri prusuttu, subbursata e capucuollu! "Panza nosta fatti capanna", punzammi ngapu nosta, lu guaiu era ca nisciuni si muveva a piglià pu primu, accussì asputtavami com'a li fessa.

Zì Ruminucu,cristianu ndiliggendu,capivu e dissu "guagliù e che asputtati?"  Mai parolu assumigliavunu tandu a na cambana a grolia.

Ngi munammi ind'a la spasa manu e tuttu e fuccammi nmocca. R'istindu rietti n'aucchiata a patrumu chi condrocambiavu cu na guardata storta. Pu nu bellu picca,nun ngi calammi chiù ma quannu zì Ruminucu nzustivu,nun ngi faciemmi pregà roi votu,né lu cavuciu ch'angappai sotta la tavula ra patrumu mi luvavu lu piaceru ri mi munà nmocca na vrenzula ri prusuttu.

-Quessa è carnu chi cresci Pippì, lassaru mangià- rissu zì Sabbetta, bona cristiana puru essa, accussì mendri loru chiacchiariavanu e buvevanu, i' e fratimi apprufittavami ca nun ngi guardavanu e ngi faciemmi tunni tunni.

Pu la via,mendri ngi'arritiravami,era già nottu,angappammi na tirata r'avrecchiu,ma era sulu n'andicipu ri queru ca ngi'asputtava a casa. Quannu pigliavu lu guardiungiellu spunzatu ind'a la secchia,capietti ca nun ng'era chiù scambu,allora mi facietti curaggiu e alluccai:

-Papà nun ngi vatti, nui simu carnu chi cresci!-

La cosa funzionavu, patrumu si fermavu, ngi punzavu nu picca:

-Iativi a curcà mó subbutu ... mannaggia bubbà!-

                                                                          Pietro Russo